នាព្រឹកថ្ងៃទី ១៧ ខែ មករា ឆ្នាំ ២០២៤ នៅទីស្តីការក្រសួងបរិស្ថាន ឯកឧត្តម ជួប ប៉ារីស៍ រដ្ឋលេខាធិការក្រសួងបរិស្ថាន តំណាងឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន បាន អញ្ជើញជាអធិបតី ពិធីចុះហត្ថលេខា លើអនុស្សរណៈ នៃការយោគយល់គ្នា ស្ដីពីការផ្ដល់សេវា រោគវិនិច្ឆ័យ រវាងក្រសួងបរិស្ថាន និង មជ្ឈមណ្ឌលរោគវិនិច្ឆ័យ ប៊ីយ៉ូម៉េឌីក ដែលចុះហត្ថលេខា ដោយឯកឧត្តម ជួប ប៉ារីស៍ រដ្ឋលេខាធិការក្រសួងបរិស្ថាន និង លោកស្រី ប៊ុត ឃុនម៉ានុត អ្នកចាត់ការទូទៅ នៃមជ្ឈមណ្ឌលរោគវិនិច្ឆ័យ ប៊ីយ៉ូម៉េឌីក នៅរាជធានីភ្នំពេញ។ ពិធីនេះ ក៏មានការចូលរួមពីថ្នាក់ដឹកនាំ មន្ត្រីរាជការក្រសួង ព្រមទាំងអ្នកសារព័ត៌មានជាច្រើនផងដែរ។
ការចុះហត្ថលេខាលើអនុស្សរណៈ នៃការយោគយល់នេះ មានគោលបំណង លើកកម្ពស់ការពិនិត្យសុខភាព គ្រប់មុខតាមរយៈ ការផ្តល់សេវាកម្ម ផ្នែករូបភាពវេជ្ជសាស្ត្រ និង មន្ទីរពិសោធន៍វិភាគវេជ្ជសាស្ត្រ ដែលធ្វើរោគវិនិច្ឆ័យ ប្រកបដោយស្តង់ដា គុណភាពខ្ពស់ ប្រសិទ្ធភាព និង សុវត្ថិភាព ដើម្បីរួមចំណែក កាត់បន្ថយដល់ការចំណាយថ្លៃសេវាពិនិត្យសុខភាព ដល់មន្ត្រីរាជការ មន្ត្រីជាប់កិច្ចសន្យាក្រសួងបរិស្ថាន និង សមាជិកក្រុមគ្រួសារ ដែលមកទទួលនូវសេវាពិនិត្យសុខភាព នៅមជ្ឈមណ្ឌលរោគវិនិច្ឆ័យ ប៊ីយ៉ូម៉េឌីក៕
